उकिता दाहाल, काठमाडौं, २८ पुस – सामाजिक अभियन्ता डा. देवेन्द्रराज पाण्डेको ‘दी आइडिया अफ इन्टिग्रिटी एण्ड दी युनिभर्स अफ करप्सन एण्ड एन्टी करप्सन’ र साहित्यकार खगेन्द्र संग्रौलाद्वारा अनुवादित ‘सत्यजीत रायका कथा’ पुस्तक विमोचन गरिएको छ।

दुवै पुस्तक प्रज्ञा प्रतिष्ठानमा आयोजित एक समारोहमा विमोचन गरिएको हो। पाण्डेको ‘दी आइडिया अफ इन्टिग्रिटी एण्ड दी युनिभर्स अफ करप्सन एण्ड एन्टी करप्सन’ पुस्तक डा. देवेन्द्रराज पाण्डेसँगै पूर्वसचिव कृष्ण ज्ञवाली, काठमाडौं विश्वविद्यालयकी प्राध्यापक अमिना सिंह र लेखक आदित्य अधिकारीले संयुक्त रुपमा विमोचन गरे।

साहित्यकार संग्रौलाद्वारा अनुवादित ‘सत्यजीत रायका कथा’ डा. देवेन्द्रराज पाण्डे र वरिष्ठ पत्रकार एवम् साहित्यकार नारायण वाग्लेले विमोचन गरेका थिए। चिरन मानन्धर, जगदीश अधिकारी, विनोद अर्यालले सञ्चालनमा ल्याएको ‘रेड इन्क बुक्स’ले दुई वटै पुस्तक प्रकाशित गरेको हो।

नारायण वाग्ले बोस, म कुल्लीः खगेन्द्र संग्रौला

विश्लेषक एवम् लेखक उज्ज्वल प्रसाईले मिठासपूर्ण सञ्चालन गरेको कार्यक्रमको शुरुमा विमोचन गरिएको ‘सत्यजीत रायका कथा’माथि टिप्पणी गर्दै साहित्यकार एवम् वरिष्ठ पत्रकार नारायण वाग्लेले नेपाली साहित्यको विकासमा संग्रौलाको महत्वपूर्ण योगदान रहेको बताएका छन्।

वाग्लेले भने – ‘अनुवादलाई उच्च सांस्कृतिक अभ्यास भनिन्छ, र, मूल कृतिको प्रतिध्वनी पनि भनिन्छ, ।’

वरिष्ठ पत्रकार वाग्लेले पुस्तकको मात्रै टिप्पणी गरेनन्। लेखक–साहित्यकार संग्रौलाको व्यक्तिगत रुपमा टिप्पणी गरेर सबैलाई हसाएका थिए।

‘वास्तवमा खगेन्द्र दाइका बारेमा मलाई जति थाहा छ, मैले जे बोलिदिए पनि हुन्छ,’ उनले अगाडि थपे – ‘यहाँ उपस्थित सबैलाई उहाँको बारेमा सबैथोक थाहा छ, नयाँ लेखकको गुरु हो भने नेपाली साहित्यको डा. गोविन्द केसी नै हो।’

संग्रौला प्रज्ञावान भएर पद र कुर्सीमा नबस्ने उल्लेख गर्दै टिप्पणीकार वाग्लेले संग्रौला सधैँ लेखक भएर चकटीमै बस्ने गरेको धारणा राखे।

‘खगेन्द्र दाइको पुजी भनेकै चोर औँला हो भनेर उहाँले आफ्नो घोषणापत्रमा लेख्नु भएको छ’ उहाँको विविध क्षमतामध्ये एउटामा आजभोलि चुनौति देखा परेको छ’ उहाँको लेखकीयमा व्यंगवाणसहित कल्पनाको कटाक्ष हो भने उहाँसँग प्रतिष्पर्धा गर्न अहिलेका लोकप्रिय नेता केपी शर्मा ओली आइपुग्नु भएको छ’, वाग्लेले भने – ‘हामी सबैलाई थाहा छ, मतगणना शुरु भएदेखि उहाँ (केपी शर्मा ओली)ले एउटा खुट्टा उचाल्नु थाल्नु भयो, तर कानूनी लिस्नो नभेटेर उहाँको व्यंगविनोद झन बढ्न पुगेछ अस्ती भन्नु भयो नि त –आयोगलाई कानूनी अलमल भए डा. गोविन्द केसीलाई सोधे हुन्छ।’

जवाफमा संग्रौलाले नारायण वाग्लेलाई ‘बोस’ भनेर पूरानो दिनको स्मरण गरे। ‘दरबार हत्याकाण्डका बेला नारायणजी कान्तिपुरको सम्पादक हुनुहुन्थ्यो, म स्तम्भकार’, संग्रौलाले भने – ‘नारायणलाई म बोस भन्थें, मलाई नारायणले कुल्ली भन्थे, अहिले उहाँ सम्पादक पनि हुनुहुन्न, म स्तम्भकार पनि छैन, तथापि, नारायणजीलाई के लाग्छ भने म अझै पनि बोस हुँ।’

पुस्तकका कथाका विषयमा जानकारी दिँदै संग्रौलाले नेपाली भाषामा अनुवाद गरिएको ‘सत्यजीतका कथा’ संग्रहमा तत्कालिन सामाजिक परिवेशका सर्वकालिन कथाहरु रहेको जानकारी दिए।

त्यसैगरी, दी आइडिया अफ इन्टिग्रिटी एण्ड दी युनिभर्स अफ करप्सन एण्ड एन्टी करप्सन’ पुस्तकका विषयमा जानकारी दिँदै डा. देवेन्द्रराज पाण्डेले संस्थागत भ्रष्टाचार तथा चीन, अमेरिका र बेलायतमा भएको भ्रष्टाचार विरोधी प्रयासका विषय उठान गरिएको जनाएका छन्।

पुस्तकमाथि टिप्पणी गर्दै पूर्वसचिव कृष्ण ज्ञवालीले भ्रष्टाचार विरोधी अभियन्ताको छवि बनाएका डा. देवेन्द्रराज पाण्डेले पुस्तकमा पनि सदाचारका पक्षमा वकालत गरेको धारणा राखेका छन्। ज्ञवालीले पुस्तकलाई नेपालीमा अनुवाद गर्नुपर्ने भनाई पनि राखेका छन्।

त्यसैगरी, काठमाडौं विश्वविद्यालयकी प्राध्यापक अमिना सिंहले भ्रष्टाचारमा केन्द्रित पुस्तकमा लामो समयसम्म सदाचारका पक्षमा चलेका आन्दोलनका विषयमा पनि उल्लेख गरिएको बताइन्। सिंहले विकासशिल मुलुकमा हुने भ्रष्टाचार एवम् मानव व्यवहारका विषयमा पुस्तक केन्द्रित रहेको टिप्पणी गरेकी छिन्।

त्यसैगरी, लेखक आदित्य अधिकारीले भ्रष्टाचारका विषयमा बुझ्न पुस्तक उपयोगी हुने बताएका छन्। अधिकारीले भ्रष्टाचार कसरी हुन्छ र यसका आयाम के छन् भन्ने विषयलाई पनि पुस्तकले समेटेको बताएका छन्।






Source: https://suvadin.com/news/music-arts-nature-and-creation/devendra-raj-pandey-and-khagendra-sangraula-books